獲邀Google演講 霆鋒分享成功人生

「Talks at Google」不時邀請社會各界嘅傑出人士到各地Google辦公室作分享，如美國天后Lady Gaga、NBA華裔球星林書豪等亦曾獲邀開talk。集演員、歌手、企業家、廚師多重身份於身嘅謝霆鋒，亦係首位喺Google香港舉辦嘅「Talks at Google」演講嘅香港藝人，認真巴閉！

 

今次一小時嘅分享會於台北、北京、上海、新加坡等地同步直播，霆鋒全程以流利英文對答。被問到點樣可以咁專注做每一樣嘢？霆鋒就話:「我喺廚房學到嘅一樣嘢，就係time management !」佢以烹飪比喻:「當你要為兩個人或四個人去煮兩道菜，係好容易，八個人，都可以，但要為十個人煮八道菜，而上菜嘅時候仲要熱嘅，特別係中國菜，就唔係咁容易。我係個好八卦嘅人，我對好多嘢都好好奇，我會成日問點解？點樣？當我一開始專注一樣嘢嘅時候，我會鍥而不捨去鑽研，唔會被難題令我卻步，呢個係我嘅性格。」

 

主持話見到佢呢一年有出歌，又為頒獎禮擔任嘉賓又做國內節目《中國好聲音》導師，嚟緊係咪喺音樂上有新計劃？霆锋話真係冇特別去plan :「如果個潮流好似浪，你捉到就會喺最高嘅位置。好似2014年我做第一季《鋒味》 ，成為內地最大型嘅飲食節目，依家我哋做到第五季。因為捉到呢個浪，依家節目行得好穩定，我就有多啲嘅時間去做音樂。」最後，霆鋒用三個Keywords去形容自己嘅性格同成功嘅人生:「Creativity，Synergy，Resourcefulness ，唔同嘅Keywords可以用喺唔同嘅階段，不過如果我係貪心啲，我覺得每一個字都係我嘅Keyword。」