Best of Awards 2019

可能有啲讀者大大已經一早請三放八，橫跨成個聖誕，甚至乎係請五放十二，由聖誕到元旦連休十多日，放個真真正正嘅悠長假期，當然今年聖誕新年假期嘅情況有啲特別，相信大家連慶祝活動都同往年有啲唔同。

 

響慶祝聖誕之餘，不妨回顧一下即將過去嘅2019年，雖然仲有個零禮拜先到2020，但坊間已經有唔少嘅回顧或者選出年度十大、最愛等等出現，對於作為數碼及IT傳媒人，當然都會留意吓相關嘅消息。

 

家陣smartphone係必需品，無論吃喝玩樂，以至理財、付費都可以一機搞掂，所以每個人都一定會裝各式各樣嘅apps，另一方面亦會用smartphone作娛樂，打機、煲劇、聽歌、睇片，梗有兩三樣會做嘅，所以無論係apps或games好，兩大平台每逢年尾都有自己嘅Awards或Best of，其中Google有Play Awards，而Apple就有App Store Best of 2019。

 

至於詳細名單編者就唔響度逐個講喇，想補充少少嘅係，Play Awards除咗有九大得獎單位，仲會有「最佳」同「傑出」名單，而App Store Best of除咗分iPhone、iPad之外，仲會有Mac同Apple TV嘅apps/games等等，有興趣可以scan個QR Code，睇吓有幾多係你有裝過，甚至到家陣仲係用緊或者玩緊㗎啦！

 

另外，除咗兩大平台出咗今年嘅apps、games排行榜之外，查實Google亦出咗2019年度嘅搜尋榜，當中有「熱爆關鍵字」、「熱爆頭條」、「熱爆話題人物」等等等等，以至「熱爆遊戲攻略搜尋」、「熱爆外遊景點」、「熱爆食譜搜尋」等等等等，由此可見今年香港人搜尋最多嘅係乜嘢話題，至於另一個YouTube嘅香港2019年度回顧「YouTube Rewind」，就公佈咗四個「十大熱門」名單，其中最值得留意嘅就係「本地原創影片」同埋「本地音樂影片」。而呢兩個榜入面有唔少結果係同近期嘅運動有關，所以佢哋嘅可信性係極高。